အပိုင်း(၁) မှ >>>
ရန်ကုန်မြို့က အဝေးမှာကျန်ခဲ့လေပြီ ... ။
လေယာဉ်ပေါ်မှာ မူးဝေတတ်တဲ့ ခရီးသည်အချို့အတွက် အခက်အခဲရှိနေပေမယ့် ကျနော့်အတွက်ကတော့ သက်တောင့်သက်တာရှိလှပါတယ်။ လေယာဉ်ပေါ်မှာ ခရီးသည် ၂၀၀ ခန့်ပါဝင်ပြီး အနည်းစုက စင်္ကာပူ နိုင်ငံမှာ ခရီးစဉ်ပြီးဆုံးကြမှာပါ။ ကျနော်အပါအ၀င် ခရီးသည်အများစုကတော့ မလေးရှားနိုင်ငံမှာ ခရီးစဉ်ပြီးဆုံးကြမှာပါ။
ရန်ကုန်မြို့မှ စတင်ထွက်ခွာကတည်းက ပြတင်းတံခါး လိုက်ကာပိတ်၊ မျက်လုံး အသာမှိတ်ပြီး လိုက်ပါလာခဲ့တာ နာရီဝက်လောက်ကြာတော့ " ပင်လယ် " ဆိုတဲ့ စကားသံက ကျနော့်နားထဲ တိုးဝင်လာခဲ့တယ်။ ကျနော် ပင်လယ်ကမ်းခြေကိုသာ ရောက်ဖူးခဲ့ပေမယ့် ပင်လယ်ထဲကို တခါမှမရောက်ဘူးလေတော့ ပင်လယ်ပြင်ရဲ့ အနှစ်သာရကို အပြောနဲ့သာ ကြားခဲ့ဖူးတာပါ။ အခွင့်ရေးအခိုက်ကနော်လည်း တိမ်ဆိုင်အချို့ကြားကနေပြီး ပင်လယ်ပြင်ကို အတန်ကြာမင်သက် ငေးမောမိခဲ့တယ်။ ရာသီဥတုကလည်း သာယာနေပြန်တော့ အလွန်ဘဲ ပြောမပြနိုင်လောက်အောင် ရွန်းလဲ့လှပလွန်းနေပါတယ်။
ပင်လယ်ပြင်ရဲ့ အဆုံးမဲ့ အနားသတ်များကို မျှော်ကြည့်ရင်း တိုက်တိုက်ဆိုင်ဆိုင် ကျနော်ထိုင်နေရာတည့်တည့်မှ လေယာဉ်အတောင်ပံကို ကြည့်မိလေမှ ကြည်နူးစိတ် အချို့ လွင့်ပျယ်ပျောက်ပျက်ခဲ့ရပြန်တယ်။ အခြားလေကြောင်းလိုင်းများရဲ့ လေယာဉ်များကို မသိရပေမယ့် ကျနော်လိုက်ပါလာတဲ့ မြန်မာ့လေကြောင်းလိုင်း ရဲ့ လေယာဉ် အတောင်ပံတွေကတော့ လွန်စွာမှ ယိမ်းထိုးလှုပ်ရှားနေတာကို တွေ့မြင်ရပါတယ်။ ကျနော်လည်း ကသိကအောက်စိတ်လေး ပြန်ထိန်းပြီး ပြတင်းလိုက်ကာကို ပြန်ပိတ်လိုက်မိပါတယ်။
တဒင်္ဂညစ်တွေးနောက်ကျိသွားတဲ့ စိတ်တွေက ကြာကြာမခံလိုက်ပါဘူး။ လေယာဉ်မယ် အချို့ အစားအသောက် လိုက်လံပို့ဆောင်နေခြင်းက ကျတော့်စိတ်ကိုဆွဲဆောင်လိုက်ပြန်တယ်။ " ဘာသုံးဆောင်မလဲ " ဆိုတဲ့ မေးခွန်းနဲ့အတူ အနားရောက်လာသော လေယာဉ်မယ်ရဲ့ ရွေးချယ်စေသော မီနူးက ထူးခြားလှပါတယ်။ အနောက်တိုင်း အစားအစာ ပုံစံ ထဲက ပေါင်မုန့်အသားညှပ် နှင့် ပုစွန်ခေါက်ဆွဲ ဘာစားမလဲရွေးတဲ့ .... ။ နောက် ကော်ဖီနဲ့ လိမ္မော်ရည် ကြိုက်တာသောက်တဲ့ ... ။ဘာဘဲပြောပြော မြန်မာဘာသာနဲ့ ရေးထားတဲ့ မီနူးကလွဲရင် ဖြောင့်ဖြောင့်မဖတ်တတ်တဲ့ ကျနော်တို့လို သူတွေအတွက်ကတော့ မြန်မာ့လေကြောင်း ရဲ့ " Yes (or) No မီနူး "ကို ကျေးဇူးတင်စွာနဲ့ဘဲ ပေါင်မုန့်အသားညှပ်နဲ့ ကော်ဖီဘဲ မှာလိုက်ပါတယ်။
ခေါင်းကြည်စေတဲ့ လိမ္မော်ရည်ကတော့ သောက်လို့ကောင်းသူရော ၊ မလောက်လို့ တောင်းသူရော များလေတော့ မလောက်ငှဘူး ၊ ကုန်သွားပြီဆိုတဲ့ တီးတိုးအသံတွေကို ချန်ထားခဲ့ပြီး ကျနော်တမှေးဆက်မှေးလိုက်မိတယ်။ အစာစားပြီး အကောင်းဆုံးသော အနားယူမှုမှာ သူများထက်သာတဲ့ကျနော်ကတော့ စင်္ကာပူနိုင်ငံကို ဆင်းသက်ဖို့အတွက် ကြေငြာသံထွက်ပေါ်လာမှဘဲ ပြန်လည်နိူးထလာတော့တယ်။ " စင်္ကာပူ တစ်ခေါက်ရောက်ဖူးရချေရဲ့ " လို့ စိတ်ထဲက ကြုံးဝါးရင်း ထိုင်ခုံမှ ခါးပါတ်ကို ပြန်ပါတ်လိုက်မိတော့တယ် .... ။
ဆက်လက်ဖတ်ရှုရန် >>>
Subscribe to:
Post Comments (Atom)
No comments:
Post a Comment